((سريعاً.. مرش))
عجبي على ناس مش ناس
غير بالكلام الفرش
ضايعين من الإحساس
واخدينك يا دنيا أفش
ماليين بطونهم نتش
الناس اللي هيَّة
معدنهم قش
ع الدنيا السلامة طول ما احنا غلابة
والناس وحوش ما بيرحموش
ظالمين الخلايق قالبين الحقائق
مدمنين ف الخدش
الناس اللي هيَّة
ليه يا دنيا ف كل ثانية قضية تانية
واحنا الغلابة أكلانا الديابة
الناس اللي هيَّة
ناس وحوش لابسين وشوش
جايين علينا ما يفرَّقوش
يا دنيا حاسبي
لتغرق مراكبي
ومين غيري يا دنيا شالك
مِبَكِيَّة عيني آه يا عيني
واجعة قلبي آه يا قلبي
مغرورة ليه بس بجمالك
يا دنيا حاسبي لتغرق مراكبي
وبلاش تشدي عليَّا حيلك
معذباني مزعلاني
يا دنيا أيوة مبهدلاني
شمال.. يمين
واروح لفين
فى عشتي ليه مطهقاني
مشحتفاني مغرقاني
ف دمع العين
طول عمري ليه وحداني
من قسوتك على طول بعاني
مشحتطاني يعني ليه
وأخرتها معاك يا دنيا ايه
ولحد فين
واخداني
أمتي تكوني مرة ليَّا
تشفي الوجع والجراح
يمكن أسامحك ع اللي راح
مش عايز منك ملايين
ولا حِتة زيادة ولا اتنين
بس كفاية يا دنيا أنين
يا دنيا حاسبي
مغلوب على أمري
خناجر ف ظهري
سكاكين ف جنبي
ليه يا دنيا كاسرة قلبي
كفاية جرح.. كفاية اتنين
أروح منك يا دنيا فين
بسلم وانتي تحاربي
يا دنيا حاسبي
هتغرق مراكبي
وانا محتار ما بين شطين
ناس بتصرخ ناس بتحزن
وناس مش عارفة مكانهم فين
ناس غلابة أكلاها الديابة
طحنها العذاب وعيشتهم هباب
مش لا قيين حتى التراب
أحلامهم منك سراب
وبيوتهم خراب
رصاص فى وداني
ارهاب وجاني نسيت حناني نسيت مكاني
خوفني زماني صبحت أعاني
منك يا دنيا
وناس غنية راكبة العربية وبدال الوحدة ف الجراش ميَّة
قابضين نفوسنا سارقين فلوسنا
ناهبين إحساسنا
برشوة وكاس وكام جلابية
ناس الخيانة فى طبعها واخدينك وواقفة فى صفها
ومعاهم ماشية ميَّة.. ميَّة
وناس بتبكي حظها
منهوبة حتى ف رزقها وما لها ديَّة
وناس بتدي لكن ما تاخد
وناس بتدي على طول أذيَّة
وناس يا عيني مش ناس مات ضميرهم ف الأساس
والرحمة والحنية
وناس أكلها الألم مرض وفقر وندم
ناس قاتلها العدم
الناس اللي هيَّة
يا دنيا حاسبي غرقت مراكبي
طلعتي روحي وقفتي قلبي
والكل واقف يتفرج عليَّا
بغرق يا دنيا يا دنيا بغرق
وايه ف أيديَّا
أو حتى ليَّا
بقلمي
أحمد الغرباوي
ليست هناك تعليقات:
إرسال تعليق