عشق بالهيروغليفي
تكبر عني بنبضتين
وحنانها زايد عن أمي يمكن بضمتين
يانهار أسود لما بشوفها
من شباك بير السلم عريانة
مقدرش أوصفها ميصحش
دي برضو إنسانه
الحب نسيها وسابها شرقانه
ولا حتى اداها معاش كام بوسة
ولا ضمة على شكل إعانه
حد يسيب القشطة يا رجاله
علشان خلفة مجتشي
مش جايز جوه الملبن منشاله
الله يخرب بيتو نجيب محفوظ
على بيت اللي جابوه
هوه السبب الأول ف اللي أنا فيه
وتنادي يا أحمد
نط ادعك ضهري باديك الشقيانة
أبوسها ازاي وأخدها ف حضني
وأنا خايف لتقوللي بالفطرة يا ابني
وحياة النبي حد يعلمني
ويفطمني
ازاي أبقى زي العشاق
وعلى طبيعتي من غير أي زواق
وأعمل كيت أو كيت
وأنعسها بشوية حواديت
وهدايا على تحبيشة أشواق
يا إما تشوفولي لبعادها ترياق
بس أنا مبقتشي حمل فراق
وكاتم نفسي أحسن أصرخ واق واق
أصلها حلوة بشكل يلخبط
ونا مش قادر أفرفط
حتقولوا عجوز متصابي
ونبي قلبي وشبابي
ولا واد ف العشرين
مع إني مواليد قيس
أو يمكن رمسيس
ومحنط عمري ميكبرشي
إلا يوم ف السنتين
أنا مالي إيدي من قلبي ومني
لكن مش عايز أغلط
لما أفتح قلبها وأبلبط
وأبوط وأتنطط وألهط
لكن خايف برضو تنطرني
أو تعمل راجل فيها
وتدي لقلبي قلمين
**
ليست هناك تعليقات:
إرسال تعليق