عشان داعش
نسكت و نسيب بشار
يقتل شعبه ليل و نهار
يعمل أسد و هو الفار
عشان داعش
تيجى إيران وحزب الله
يجيى روسيا و اللى وراه
عشان داعش
نقسم سوريا 100 حتة
و ننسي همومنا بالحتة
عشان داعش
إيه يعنى لما تكتر الأكفان
و يموت كل ثانية إنسان
كله يهون فدا داعش
بنبني دولة الإسلام
مش مهم فاضل كام
ولا دين ولا إسلام
دة كله يهون
عشان داعش
هنبني خلافة يا سادة
و هنرجع تانى السادة
ناخد كل حاجة و زيادة
نرفع راسنا وسط الناس
ونقطعها بإيد داعش
دة كله يهون عشان داعش
تضيع سوريا تضيع سينا ء
تضيع ليبيا على إيدينا
عشان داعش
تضيع الموصل الحدباء
يصير البشر إشلاء
و ناخد دينا من حرباء
و ماله عادى كله يهون
عشان داعش
شعوب مضروبة ميت صرمة
و عاملة فيها محترمة
هانيجى بصارم مش صارمة
ونقتلكم بسيف داعش
سلاح فتاك ومتجرب
هنقتل بيه وشوف جرب
هنقتل بيه إبوك و إمك
نقتل بيه إخوك و إختك
و كل قريب و مقرب
عشان داعش عشان داعش
هنتعايش مع تعلب مع تعبان
هنتعايش مع حية وليها سنان
عادى لما نشرب العذاب ألوان
و نتعايش عشان داعش
و نشرب خمرة مع دخان
نهرب م نيران داعش لإى مكان
نموت ف البر إو فالبحر
ندق على الجباه صلبان
ونسيب بلادنا و ولادنا
عشان داعش .
تعالي بس
نتناقش مع داعش
سؤال ممكن ؟
سمعت إن القدس محتلة
من اليهود إديلها عقود
و إحوازنا فى إيد الفرس من بدري بيقضوا عليها
و إحنا دفنين راسنا زى الدود؟
سؤال تانى ؟
سمعت إن فيه بلاد برة بقى الإسلام رقم واحد
وبعد ظهوركم المشئوم ما عاد يسلم ولا واحد ؟
سؤال كمان ؟
كام عالم مؤيدكم
كام مسلم بيدعلكم
كام إنسان بيهرب من بلاد الظلم ويجيلكم؟
هنسئل ياما ونكتر
و نتناقش وهنفكر
و نرجع تانى نبكى على ولادنا و ع الإوطان
عشان داعش
هنتناقش ونتناقش وفى الاخر هتقتلنى
عشان داعش
............................ ف 21 / 11 / 2015
من صفحة الشاعر / شعبان مكى شاعر عامية
ليست هناك تعليقات:
إرسال تعليق